Handszuiczki, makowy, zoki, a moje konski

Na somprzod dostouch take blank maue, take ze jednym palcym. Juz niy poradza się tych piyrszych spomniec, ale mom fotka, tako kero chyba kozdy mo na pamiontka, na keryj je zech roczek - blank maluski i fajnie po biouymu obleczony. I bezto tysz coch się rodziou w zima, to te moje piyrsze handszuiczki na niyj widac. Potym to juz konsek poradza se spomniec. Wiym, co te nostympne bouy sztrikowane. Kej się stargauy, to juzas bouo co do prucio, a potym bou do nos bajtlow szpas, bo kulauo się kulki z wouny. I juzas bouy gibko nowe handszuiczki. A jeszcze potym prziszou czas kej piyrszy roz kozdy się z synkow mog poasic, co mo jak fater take fajne ze palcoma, a jak już kerys miou ze skory handszuiczki, to to bou już blank wielki as. I bouo egal wiela od nich palce bouy jeszcze za duge, u niykerych to szuo pedziec , co bouy pieronym matne. Zodnymu to nic niy robiouo, kozdy uaziou w nich i smolou to czi mu bouo zimno w rynce czi niy, wazne bouy ino handszuiczki. O makowach sam wiela niy byda spominou, powia ino coch je tysz poznou, a wiycie przeca jake to bouo z nich pieronstwo - nic w nich niyszuo chycic. Jakech miou fatrowi pomoc sniyg odciepnonc, abo somsiodce wyngel sciepnonc do piwnicy, toch brou makowy. A zoki? Zoki tysz bouy sztrikowane ze wouny, ze sprutych starych pulouwrow. Ja, tak bouo i w tym idzie znosc fajne spomniynia. Ach ja, jeszczech se cosik spomniou o handszuiczkach, przeca te ze jednym palcym szuo blank gibko przeuonaczyc na chopka do teatru. Palec od nich się wrazauo rajn i to bou dziobek, abo szuo tysz ze niego zrobic kichol. Slypia to bouy dwa knefle, kere się cza bouo prziszyc,a mycka tymu chopkowi się robiouo ze papioru - tak jak się robi uodki(przeca wiycie). Potym to juzas mieli my z tego teater, bo cza bouo te knefle odpruwac, coby gibko szu ponsc na plac i się ciepac kulkoma ze sniega. Co to tysz te bajtle niy poradziyli mieć kedys szpasu(?)Tak do przikuadu ze normalnymi handszuiczkoma idzie już mauo geszichta, abo jaki konsek i starym Pieronom naszkryflac. Sam dowom jedyn konsek odymie :

Handszuichki
Handszuiczki, handszuiczki
Wiela to juz lot
Kejch je z jednym palcym nosiou
Dzisio rod bych juzas znod
Handszuiczki, i zas ouma prosiou
Coby fajne mi usztrikowaua
Take nowe, kolorowe
Abo mamie codziyn od niyj „krod”
Coby mieć te co palcow majom piync
Tak spominom w handszuiczkach
Nosz za bajtla swiat
Couki z wouny sztrikowany
On bou ciepuy, on bou swojski
Bo couki od oumy i couki od mamy.
Czamu sam o tych handszuiczkach szkryklom (szkryflom)?

Mysla, co kozdy z wos już se tak niyroz myslou jaki fajny konsek abo mauo geszichta naszkryflac. Tukej mom mauy pomys - oguoszom sam mauy konkurs na szkryflanie konskow i fajnych geszichtow. Niych kozdy kery już się tym kedys marasiou abo kery ajnfach mo chync się tym aby roz zmarasic, jakis aby krotki konsek, geszichta abo co tam jeszcze do nos do Echa Slonska narichtuje. Nojfajniyjsze a mozno i wszyske bydymy sam dowac a tyn kery wygro pondzie i do wersji drukowanyj. Niy nagroda się ale liczy, wazne je coby konsek rozkulac ta naszo godka i posznupac za Pieronami, kere się niy bojom szkryflac po naszymu. Mom nadzieja, co na drugi roz tyn titel pondzie juz zmiynic na koncu na „...nasze konski”.

Prosz Wos tysz przisyuejcie je na necowo adresa Echa Slonska ze redakcji, ale na osoba Szwagra - znondziecie mie na wiyrchu kozdego wydania Echa Slonska. Tekst tyn tysz posyuom do naszyj Szwalbki czyli „Jaskolki Slaskiej”.

No to już terozki koncza te moje fandzolynie i zegnom się jak zawsze moim

Pyrsk !

Szwager