Listy czytelników

Nazwisko mordercy Kupki !

Pyrsk z Piekor !

Pisa do Wos bo jedna sprawa niy dowo mi pokoju. Przecytołech artykuł ło Kupce i Korfantym. W dzieciństwie mooj starosek Johann łosprawioł mi roztomaite dzieje ze swoigo życio. Było co posłuchać - siedzioł w ruskich i polskich lagrach. Roz casu pedzioł mi historia, jak we wrześniu 1939 poloki "ewakuuwali" wszystkich śloonzokoow z Piekoor. "Uciekoł" tak przed niymcami z śtyrooma kamratami. Jak spali w jakiś stodole kaś w Polsce pod Olkuszym słyszoł jak jego kamraty godali ło Kupce. Myśleli że mooj starosek jus usnooł, i trzech łopowiadało tymu cwortymu jak to zabiyli Kupki. Wysłyszoł że herszytm booł niyjaki Przibyłek (?) z Piekor (Nawiasym kuzyn jego żoony, a moi babki). Chwolyli się, że soom Korfanty wydoł wyrok na Kupki. Bardzo to wystraszyło i znerwuwało moigo staroska, bo Kupka booł jego sztajgrym na grubie - starosek robiooł w Bytoniu. Jak starosek wroociył z tyj wyndroowki to wydoł Przibyłka niymcom i trefiył łoon do Auschwitz (co dziwne dożył tam koońca wojny - musioł tam chyba być koonfidyntym). Starosek nigdy tego niy żałuwoł. Niystety Johann niyżyje jus łod 8 lot, a jo pisa to do wos coby niy zapoomnieć i coby prowda ło tych polskich "bohaterach" ujrzała światło dziynne. Starosek booł mojym nojlepszym przijacielym i zowdy chcioł coby ludzie dowiedzieli sie ło kupce - jak żooł to niy moog tego zrobić skuli koomunistoow.

Sławek z Piekor

Śloonzok z dziada pradziada i cołkij duszy

O Theofilu Kupka:

• Mord an Theofil Kupka

• Sprawa Teofila Kupki