Dr Leopold Walla

urodziył sie w 1914 r. w Rydułtowach. Po skończyniu szkół w Rydułtowach i Rybniku sztudyrowoł weterynatjo we Lwowie. Skuli wybuchu II wojny nauka kontynuowoł we Wiydniu, kaj tyż w 1940 roku zrobiył doktorat. Potym zostoł powołany do Wehrmachtu. Dziynki swojimu fachowi mioł te szczynści, że ni musioł do żodnego szczylać. Lata te opisoł późnij w ksionżkach-broszurkach "Ein Ost-Oberschlesier wird Tierarzt" ("Górnoslonzok zostowo weterynorzym"), "Ein Tierarzt aus Oberschlesien im zweiten Weltkrieg" ("Górnoslonski weterynorz w II wojnie światowej"). Po wojnie osiod we Wiesloch, wele Heidelbergu, kaj napoczon jako asystynt, a z czasym założył własno klinika weterynyryjno, kiero istnieje do dzisio. Choć przeszło 50 lot żył z daleka od swoji rydułtowskij Domowizny, to nigdy o nij nie zapomnioł. Na terynie staryj kopalni zinku i szrybra założył Skansyn Górnoślonski (Oberschlesisches Freilandmuseum), w kierym odtworzył nikiere rydułtowski budynki i elemynty górnoślonskigo landszaftu. Był tyż autorym wielu ksionżek, nie yno fachowych z weterynarje, ale tyż o Górnym Slonsku. Okrom tych wyży wspomnianych som to: "Chronik von Rydultau" (Kronika Rydułtów), "So lebten wir in Oberschlesien" ("Tak żyli my na Górnym Slonsku" - o downym życiu i obyczajach), "So lacht man i Oberschlesien" ("Tak sie śmieje na Górnym Slonsku" - slonski wice), "So spricht man in Oberschlesien" ("Tak sie godo na Górnym Slonsku" - słownik nimieckij godki ślonskij) "Oberschlesisches Freilandmuseum" ("Skansyn Górnoślonski" - broszurka-folder). Jego nazwisko znajom tyż na pewno czytelnicy Heimat-cajtunga "Der Rybniker" , kaj czynsto pisowoł. Za zasługi w upamiyntniyniu historie i zwyczajów Rydułtów dostoł w 1995 r. od Rady Miasta dyplom Honorowego Obywatela Rydułtów. Dr Walla umrzył w 2001 roku.

Jako przikład jego ślonskich wspomniyń załonczom fragmynt ksionżki "So lebten wir in Oberschlesien", w kierym jo godka o chlebie - "Die Krumka Brot"

LeChris