Drogi Przijocielu CHRIS

Kożdy list od Wos, to jak podładowani akumulatora. Serdeczne dziynki za tyn ostatni z dnia 14.12.2001 i za dołonczone dwa egzymplarze "ECHO SLONSKA".

Tyn cajtung ślonski może mieć ciekawo prziszłość, bo - jako to w liście piszecie - mo nojtralno oriyntacjo i obiektywnie podchodzi do spraw naszej DOMOWIZNY na kero Poloki kożom godać MALA OJCZYZNA.

Załuja jyny, że do tego pierzińskigo INTERNETU ni mom dostympu. Ale, mom też życzliwych ludzi i to - aż w Krakowie. Przisłali mi kolorowe wydruki z - www.skarbiec-slaski.itatis.pl.

Oczywiście - nie wszyjstko, co tamyk sie znojdło zostało mi przisłane, a jyny pora szkartek z II Familijnego Zjazdu Krzinkowiczów z Klubu Slonskie Beranie - WISLA 2001. To mnie zbudowało - gynau, jak listy i dołonczane materiały (kasety, cajtungi)- od Was.

A jeszcze bardzij raduje mnie fakt, że ta moja pisanina - jak choby FYRCOK cz. VII i teksty do NOWIN - idom też dalij do ludzi, kerym nasze ślonski sprawy leżom na sercu - poprzez INTERNET. To mnie buduje i mom se za coś.

Ale, tym wiynkszo jest moja żałość skuli tego, że som nie umia se tego obejzdżeć. Ani mojigo FYRCOKA cz. VII, ani tych tekstów wysłanych do NOWIN, ani ... ani.

Beztoż tyn INTERNET to je cudowno rzecz, ale "żywej" ksionżki i tekstu wydrukowanego w gazecie nie zastompi. Uzaś co sie tego INTERNETU tyczy, to "immer noch" za wiela ludzi dostympu do niego ni mo.

Możno kedyś bydzie to w cynie zwykłego telewizora. Jednak czas nie stoji w miejscu. Lot przibywo a zdrowio ubywo. NORMALNE. Beztoż musiołech se też troszka ponarzykać ale - dej B0ZE jyny taki powody do narzykanio, kere majom u podłoża satysfakcyjo i radość.Prowda piszecie o tym, że "Slonsko Krzinka" to ni ma jedyno ślonsko eka w INTERNECIE. Takoż samo organ prasowy Ruchu Autonomii Sląska co mo tytuł "Jaskółka Sląska" tez mo swój www.raslaska.org (to je do kolegium redakcyjnego). Ale wele tego mo normalny adres na kery kożdy może wysłać własne teksty tj. Redakcja "Jaskółka Sląska". Plac Wolności 7. 44-200 RYBNIK.

Podwiela redaktorym naczelnym Jaskółki Sląskiej był założyciel Ruchu Autonomii Sląska - Rudolf Kołodziejczyk - toch był stałym współpracownikym tego miesiyncznika. Prawie w kożdym numerze byłv moji teksty (fragmynty FYRCOKOW).Dziepiyrko, jak Rudolf Kołodziejczyk zrezygnowoł z funkcyje naczelnego redaktora (do dzisioka nie wiym - czamu) to i pismo schudlo i zubożało.Ale, Ruch Autonomii Sląska pozostoł tyn som co był i nic sie nie zmiyniyło, coby sie dało festy zauważyć. Ostatnio teżech wysłoł do Jaskółki Sląskiej pora stron tekstu, bo jako to idzie poczytać w załonczonych wycinkach prasowych - joch je od samego poczontku nie jyny sympatykym RASl., ale i na członka mnie przijmnyli.Ta moja nieskrywano sympatyjo do RAS1, nie kolidowała aż do tego kończoncego sie roku 2001 - z aktywnom działalnościom w Towarzystwie Przyjaciół Sląska w Warszawie - kerego to towarzystwa byłech też współzałożycielym.Od wiosny tego roku (2001), a - konkretnie - od powrotu z II Familijnego Zjazdu Krzinkowiczów z Klubu Sląskie Beranie - WISŁA 2001 - dostowołech odczuć, że coś sie zepsuło. Nie z mojij winy, te 5 tomików mojich ksionżek z FYRCOKIYM w tytule - warszawskich Slonzoków jakoś nie żgało - i to przez cołki piyrsze dziesiyncioleci działalności TPSl w Warszawie. Dziepiyrko tyn szósty FYRCOK zacznył żgać skuli tego że mioł promocyjo w czasie ZJAZDU we WISLE i poszoł z inszymi do INTERNETU.

Wszyjstko skuli tego że warszawski TPSl przeszło w drugim dziesiyncioleciu działalności od CZŁOWIEKA ku INSZTYTUCYJOM. O tym żech napisoł w artykule do Jaskółki Sląskiej. Nie wiym, czy wydrukujom. Eli ja - to Wom skserowav numer prziśla. Eli ni - to prziśla skseroway" maszynopis. Choby jyny jako ciekawostka, jako to wierność filozofii od FYRCOKA może po czasie zaszkodzić tukej we Warszawie, a i w naszej DOMOWIZNIE, kandy żyje mocka ludzi co mówią a nie godajom. Bo godać nie poradzom uzaś nauczyć sie nie chcom, bo w szkołach i urzyndach jyny sie mówi. I tak dobrze, że za godani nie karcom - jako to tymu zarozki po wojnie bywało. Som żech to przeżył.

Niejbardzi irytuje Slońzoków, co majom polskigo ducha w pojstrzodku fakt, że FYRCOKI pisane som WONGLYM a ni OŁOWKYM ani BLAJSZTIFTYM.

P.S.

Prawie w trakcie pisanio tego listu, wcisła ml sie do ucha z radioka wiadomość, że Trybunał Miyndzynarodowy nie prziznoł nom NARODOWOSCI. Prziznoł - nie prziznoł, to i tak w mojij myntalności Górnoślonzoka nic sie nie zmyniyło.

Ja toż, żeby ta wiadomość przifiurgała z nieba na skrzidłach Anioła Stróża od Górnoślonzoków - to zaczon bych rozwożać, czy nie chca zawiela i w dodatku coś nieziymskigo. A tak powiym - jako by FYRCOK na to pedzioł: - knadyś mom orzeczynio trybunałów, bo i tak nasz Górny Slonsk bydzie mioł dalij swoji miejsce na mapie Europy, dalij bydzie godoł a nie mówił, dalij bydzie dumny jak sie narobi - i gańba go bydzie za byczyni sie i wynokwiani pieron wiy czego, a przeważnie stawiani pytań - co, za co, od kogo i za wiela?

Ta odmowa prziznanio mom NARODOW0SCI SLONSKIJ jeszcze bardzij mobilizuje mnie do głośnego i jawnego manifestowanio swojij ślonskosci i do jeszcze wiynkszej dumy z tego tytułu.

Nic nie jest wieczne a ci, co decydujom a tym - czy mon godać na miejsce urodzynio OJCZYZNA czy HEIMAT mogom sie nawet sfajdać, to i tak dlo mnie Górny Slonsk bydzie jyny DOMOWIZNA - co to - ani HEIMAT ani MAŁO OJCZYZNA. I nie miyszać DOMOWIZNY z OJCOWIZNOM, bo OJCOWIZNA to 12 hektarów od starzika z inwyntarzym i zabudowaniami. Uzaś DOMOWIZNA - to cołki Górny Slonsk - ale tyn pokozany na załonczonej mapce.

Jedno, co we człowieku zostowo na cołki życi, to som "ERLEBNISY" z dzieciństwa. Dlo mnie były to prawie "ERLEBNISE" a nie "PRZEZYCIA", boch dzieciństwo pinkoł za Niymca a nawet - jak to godajom Poloki wczesnej młodości żech doczekoł jako obrońca Vaterlandu w szeregach wojoków po "Wehrertüchtigungslagrze", kere to wojoki, co miały po 14 i 15 lot, broniyły - do kupy ze Volkssturmowcami co mieli po 60 i wiyncyj lot - ostatnich pozycji na froncie. Do ostatka my wierzyli w obiecowano przez Hitlera "Wunderwaffe". Nie prziszła. Prziszło za to orani myntalności, ogłupiani, straszyni bebokami, a tak rychtyk, to bebokami byli ci, co straszyli.

Beztoż - eli by mi prziszło orzeknyć - wiela KOGO siedzi w mojim pojstrzodku - czy wiyncyj Niymca czy Poloka - to bych padoł NIYMCA, choć Poloki zrobiyły mnie mimo woli polskim oficerym. Ale wtedy toch już był dorosły i na tela przesionknyty "swojiznom" - żech nie wyrosnył na polskigo patrioty, boch nie był we sztandzie w ciongu 24 godzin podmiynić moja cywilizacyjo europejsko na bizantyjsko.

I choć blisko 50 lot miyszkom we Warszawie, ślubno mom z Wilna, to tukej ani razu mi Poloki nie zaimponowały czymś, cobych umioł od nich ze wdziyncznościom przijońć.

Uzaś to, co joch im oferowoł - to za pierona nie umiało sie tukej przijmnyć. Jedynie w mojij nojbliższej rodzinie było wedle wzorców wyniesionych z rodzinnego domu - to znaczy - syna my wychowali jak sie noleży, a wnuk sztudyruje we Wyrszym Syminarium Duchownym.

Jest pora Warszawioków, kerzi na mos palcami pokazujom, ale to jy- ny po to, żeby insi brali znos przikłod. W 1986 roku nawet telewizyjo zrobiyła w mojim domu reportaż, co poszoł na cołko Polsko.

Beztoż po tych wszyjstkich przeżyciach zostołech sobom, czyli Górnoślonzokiym z górnoślonskim duchym w pojstrzodku, kery na miejsce swojigo urodzynio bydzie godać DOMOWIZNA, jako i mój starzik Francek urodzony w 1870 roku godali.

Eli czego (kogo) mi żol skuli odmowy nom narodowości ślonskij, to jyny tego, że młodzioki bydom zmuszone dalij przioblykać uniformy z polskich magazynów i słuchać polskich komynd - abo nimieckich - eli wyjechali do Reichu. A jest ich ad pierona.

W czasach mojij krótkij praktyki nauczycielskij w Gosławicach/Opole miołech w klasie 40-cioro uczniów. Zostało 7-mioro. Reszta wyjechała do Niymiec. Beztoż i w mojij ksionżce, co mo tytuł "300 DNI NA OBCZYZNIE" mom opisane - jakoch to sie spotykoł śnimi we weekendy podczas mojich wielomiesiyncznych nikiedy pobytów służbowych w Niymcach, na co godajom "spotkanio autorski".

To by było natela. I ni miołbych nic naprociw, eliby tyn list trefiył na adres: redakcja@EchoSlonska.com. 

Z głymbokim szacunkiym i życzyniami
wszyjstkigo, co nojlepsze w Nowym Roku 2002
życzymy Wom i cołkij Waszej Rodzinie,
a takoż i redaktorom "Echo Slonska" - tego samego

życzą z Warszawy

Paciokowie - Rudolf, Krystyna, Andrzej z naszym klerykym Łukaszym