Slonske konski
spacer po mieście, bez paryzola
kropelki dyszczu za kragiel lecom,
cicho liściami szumi topola,
miyndzy drzewami latarnie swiecom
Po Mysłowickim rynku dostojnie
lipcowy wieczór pomału kroczy,
odchodzi w ciszy, bezto spokojnie
mogiymy dyszczym sie zauroczyć.
Roz, dwa, trzi, śtyry - próba klawiatury,
juz ni ma hicy, cosik pyrsko z góry,
niebo chmurami szczelnie zaciągnione
nad klawiszami rynce ustawione.
Dyszcz kropelkami błyszczy jak diamynty
spływajonc strużkom miyndzy fundamynty
miłości moi. Ach przidź na spotkanie
bo czekom..... Idzie mi pisanie?
Roz dwa, roz, próba - to hica! Godołech!
ino sie skończyła rymy połapołech.
Teroz moga ukłodać słowa rymowane
i posyłać na forum kaj bydom czytane
Moje miyjsce na Ziymi
Kraina kaj hołda krajobraz łoszpeco,
kaj drzewa sadza całunym okrywo,
kaj promiyń słońca bez dymy przeświyco,
kaj brudno rzeka smutnie w dal odpływo.
Kaj prawi ludzie, kierzy wieki całe
Ślonskie tradycje jak skarb przechowujom,
na przekór obcym, kierym się wydaje
co Ślonsk to w sercu ino starzi czujom.
Cos mie tu trzimie jakby na kotwicy,
Kajkolwiek jestech to chca tukej wracać.
I niy zowiszcza tym, co kaś w stolicy
Mogom się miyndzy sławnymi łobracać.
Tu moje przodki leżom pochowane,
starzik i starka razym, kole siebie.
Czekajom teroz tak jak przykozane
Na tref łostatni, kiery bydzie w Niebie.
I choć som landy na świecie gryfniyjsze
Tu jest mój heimat, niy zmiynia go za nic.
Mało ojczyzna, to mi nojmilyjsze,
Teroz w Europie, kiero niy mo granic.
Kiyks
(ze Myslowic)
