Laufpas
W mojih ukohanyh Uogewnikah Szloonskih bydymy teroski stowjac’ na turyzmus.
Bo we starym, teroz’niejszym przemys’le, soom My jurz zrestrukturyzowane.
Prawje w coukos’ci.
Pjyrsze boouo w tym - niygdej, goornictwo.
Tak po prowdzie, to s Nos boouy experymyntatory!
Nasza gruba „Uogewniki” kuplowali wtynczos ze „Rozbarkym”.
Bo u Nos woongel mjou sie ku koon’cowi.
Potym prziszou czas na transport.
Baza PKS we Dworze.
Niy boouo cego rzauowac’.
Szofery przijezdne, to sie bez zuos’ci wynioosuy.
Moomy bez to czys’ciejszy luft wedle droogoow.
Hutnictwo jurz tyrz moomy pod syndykym. We likwidacyji.
Ze werku uostauy po „Zygmooncie” ino hale, w keryh teroski zaczynajoom gospodarzic’ Francuze.
Smrodzoom Noom jurz ino „Goomowe”, przekludzoone doo Nos ze Mjehowic.
A mjauy byc’ nowoczesne i przijocielske dlo Natury.
Teroski, soom podstarzaue jak i My.
I jak stare ludzie we wjynkszos’ci, uoone tyrz majoom smrodlawe wjatry na staros’c’.
A na to, bezma, niy ma rady ani lyku.
Pudzie Noom z tym rzyc’ do koon’ca!?
Ale, za porzoondkym!
Zeszuo sobota przi smyntorzu, po drugi stroonie glajzoow, horzowjoki ’ na powroot uotwarli boonker.
Jak za Stary Polski.
Dowac’ to mo poczoontek planowany s’ciyrzce dydaktyczny po poonkcie uoporu „Uogewniki”, co kejs’
przinolerzou do fortyfikacjoow - Warownio „Szloonsk”.
Morzno snojdzie poru przi tym robota? Uobocymy.
Podwjel co, uogewnicke bezrobotne mjauy darmowo, wojskowo, grohoowka.
Farorz, ze s’w. Joozefa, kjerzi go kropjyli, prziznali sie bez bicio, irze nareszcie poculi laufpas.
Bo jurz uod dziecka kcieli sie snojs’c’ w niym drinyn, ale wtynczos Im tego starsze brooniyli.
Noom tego niy wzbrooniali.
My Nasz boonker znali uod wjyrhu do spodku i po uoomacku.
Hoc’ wtynczos niy trza sie boouo tak ciynrzko przeciskac’ po sztobah mjyndzy sztokami jak teroz.
Cy by My sie spragdali uod tego czasu?
Bajtle, kjere sie tyj uroczystos’ci przigloondauy z wjyrhu uopanyrzoonego, wojskowego woza rodym ze Siymjanowic,
tyrz go culi.
Wjela go cuje i z rostomajtyh powodoow, hoc’ mauo kjery wjy, co sie pod tym suowym kryje?
Jo nawet niy poradza sie yndlih spoomniec’, jak sie uoon gynau po prowdzie pisze?
Ale cuja go jak korzdy.
Nojbarzi wtynczos, jak sie moga prziblirzyc’ ku Prowdzie. Uoo Nos samyh.
Nasi Farorz, kiej nawjedzali groob Jauernicka we Doombje pod Uopolym, naszego pjyrszego Farorza, co po Plebiscycie
musiou z Uogewnik is’c’ weg, tyrz sie pewnikym ku Niyj zblirzyli.
A bez Nih i inksi.
Moja s’lubno za dziecka mjaua laufpas przi Ooumje Anie.
To u Ni moogua wycioongac’ wszystke klamory ze spodka byfyja i sie niymi zabowjac’. Fyrlokami, warzehami
mjyszac’ bez umjaru we gorkah i miskah.
Larmowac’ pokrywkami i troombic’ bez trihter.
Kulac’ po poduodze nudylkuloom.
„Warzic’” w szolce hawerfloki z cukrym. I sie niymi zajodac’.
Uoona sama dowaua sie wyrywac’ resztka „pjoorek” na gowje przi grackah za frizjyrka.
Przi farbowaniu, cesaniu i ukuodaniu weloow.
Zaplotaniu i uowijaniu wosoow w nestlik, hocia go sama niy nosiooua.
Hana, hopcula, pocua go, jak ze Karouym wuaziooua do niywymoocoonego rzyta.
Za beszoongym z woonskym torym.
Tyjo, zowdy jak przijedzie z Niymjec i na uogroodkah s’pjywo z Nami stare szlagry i pjes’niczki.
...
Cuje go nawet stworzynie.
Co`h soom ujrzou, pjyrsze - za modu, przi sposobnos’ci przepinanio ooupiny Zynty.
Ze lan’cuha uod budy, do koouka na droocie bez postrzodek podwoorzo.
Uod toond spokopjoou`eh powjedzynie: serwou sie jak pjes z lan’cuha.
Zynta pocua swoboda. Hoc’ ino do foortki.
Z tego wnioskuja, irze pojawjo sie uoon wtynczos i u tyh, kjerym sie przodzi cegos’ bardzo wzbroonio.
Wjela ludziskoow teroski zahodzi do gowy coby sie spoomniec’, cego to wzbrooniali Szloonzokoom, kjerzi poculi
laufpas we uostatniym spisie?
I cy mo uoon i u inkszyh wjelake znaczynie?
Jak suowo – wybieg?
Antoni Respondek