Igraszki - Fraszki
IDEJA
Dni Ślonska teroz siedzom mi w gowie
Chyba na czasie je to ideja
Pomog by we tym mi dobry czowiek
Bestoż w Internet pomysł tyn sieja
MIEJSCE
Nojlepi sztartnońć z tym we Gliwicach
To miasto dzisioj mo szwongu wiela
Uśmiych by gościoł na ślonskich licach
Bez tydziyń byłaby tu niydziela
NADZIEJA
Mom ta nadzieja – mocno chca wierzyć
Że miasto chyci ta sprawa
Bydymy mogli te dni tam przeżyć
I udo się nom zabawa
POTYM
Dyć potym jednak Gliwice trza nom
Wspiyrać w harowie przi tymu
Niych insze miasta tyz za tym stanom
W zgodzie bo niy trza nom dymu
SZPRINT
Czasu już na to niywiela momy
Przed referyndum trza by to zrobić
Ale jak richtig we to sie domy
Rekord pryndkości mogymy pobić
TERMIN
Termin mi taki prziszoł do gowy
Bydzie dość dobry – nic we nim złego
Wybroł żech drugi weekend majowy
No a nojlepi tak łod łosmego
HASŁO
Hasłym zaś bydzie „Ślonsk i Europa”
Terozki chycić to musi
Może sie skończy naszo utropa
Yno trza euro tu kusić
I TAK DALI
W Gliwicach piyrszy roz by to było
Potym leciałoby dali
Za rok kajś indzi by sie krynciło
My by się tam radowali
W KOŃCU...
W końcu z kożdego regionu konska
Z Grinberga po Katowice
Miasta by chciały robić Dni Ślonska
Marzonc ło takim zaszczycie
PROPOZYCJO
Jo bych notgeldy przi tym wystowioł
Na kerych Ślonsk je nosz cały
Jednych bych uczoł a inszych bowioł
Taki mój pomysł je mały
KIERMASZ KSIONŻKI
Kiermasz sie marzy piykny niymały
Z ksionżkom ło naszym regionie
To już łobchodow punkt byłby stały
Trza nom to zrobić – jeronie!
PROPOZYCJO
Dyć z tego forum tyż wybrać szło by
Zwrotki nojlepsze zofcite
I tomik fraszek z tego by zrobić
By go promować we dni te
RAJZY I FERIE
A może by tak torg turystyki
Naszy tutejszy tyż ślonski
Po co wyjeżdżać nad Adriatyki?
Znosz piykne ziymi tyj konski?
FILM
Trza przeglond filmow tyż zrobić przi tym
Tymatym ślonskim sie chwolić
Niy boć się jakiś niymondrych krytyk
Kryńcić a mamlasow smolić
APEL
Ze tego forum wszyskich chca prosić
Wciepcie tu swoje pomysły
Pomożcie mi ta idyja głosić
By te Dni Ślonska nom wyszły
Zaproszom wszyskich na forum kaj pisze sie ło Ślonsku, po ślonsku i we rymach.
Adres www.echoslonska.com/forum2
Bronisław Wątroba
